Янгиликлар

ҲУҚУҚИЙ МАДАНИЯТНИ ЮКСАЛТИРИШ

Жамиятда ҳуқуқий онгни, ҳуқуқий маданиятни янада ошириш ва қонунийликни мустаҳкамлашга қаратилган ҳуқуқий билимларнинг аҳоли ўртасида кенг тарғиб қилинишини ташкил этиш мақсадида Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман), Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини-ўзи бошқариш органлари қўмитаси билан ҳамкорликда “Ёшларда инсон ҳуқуқлари маданиятини ошириш ва ҳуқуқий маърифат ишларини янада такомиллаштиришнинг долзарб вазифалари” мавзусида видеоконференция ташкил этилди.

Видеоконференцияда Навоий вилоятидаги олий таълим муассасаларининг профессор-ўқитувчилари, вилоятдаги давлат бошқаруви органлари, ҳуқуқни муҳофаза қилувчи ва суд идоралари, жамоат бирлашмалари ҳамда оммавий ахборот воситалари масъул ходимлари иштирок этдилар.

Видеоконференцияни Ўзбекистон Республикаси Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини-ўзи бошқариш органлари қўмитаси раиси А.Саидов кириш сўзи билан очиб, ёшларда инсон ҳуқуқлари маданиятини ошириш ва ҳуқуқий маърифат ишларини янада такомиллаштириш юзасидан бир қатор таклифларни илгари сурди.

Шундан сўнг, Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) У.Мухаммадиев сўзга чиқиб Омбудсманнинг фаолияти, амалга оширилган ишлари тўғрисида батафсил тушунчалар берди.

Адлия вазирлиги Ҳуқуқий тарғибот ва ҳуқуқий таълим бошқармаси бошлиғи Ҳуқуқий тарғибот ва маърифат бўйича давлат органлари ишларини мувофиқлаштириш бўйича идоралараро кенгаш томонидан жамиятда ҳуқуқий онгни, ҳуқуқий маданиятни янада ошириш борасида амалга оширилган ишларни таъкидлаб ўтди.

Конференция сўнгида вилоят студияларидан қатнашаётган иштирокчилар ҳам ўзларининг фикр ва мулоҳазалари, таклифларини билдириб ўтдилар.