Янгиликлар

КИЧИК БИЗНЕСГА РАҒБАТ

Конимех туман ҳокимлигида Ўзбкистон Республикаси Президентининг 2015 йил 15 майдаги “Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги Фармонига асосан ҳудуд иқтисодиётида ҳусусий мулк улуши ва аҳамиятини ошириш, кичик бизнес ва хусусий тадбиркорлик ривожланиши йўлида тўсиқлар ва чекловларни бартараф этиш, уларнинг ялпи ҳудудий маҳсулотда улушини изчил оширишни таъминлаш бўйича амалга оширилаётган чора-тадбирларнинг натижадорлигига бағишланган семинар бўлиб ўтди.

Семинарда тарбиркорларга ҳамда касб-ҳунар коллежлари битирувчиларига яратилган имтиёзлар тўғрисида фикр билдирилди.

Шунингдек, юқорида таъкидланган Фармоннинг мазмун-моҳиятини тадбиркорлик субъектларига етказиш, Фармонда кўрсатилган имтиёзлар ва переференцияларни тадбиркорлик субъектларига тушунтириш ҳамда назорат қилувчи органлар ходимларининг масъулиятини ошириш тўғрисида фикр юритилди.

Хусусан, Фармонга мувофиқ, тадбиркорлик фаолиятига ноқонуний аралашиш ва тўсқинлик қилиш, хусусий мулкдорлар ҳуқуқларини бузганлик учун давлат, ҳуқуқни муҳофаза қилиш ва назорат қилувчи органларнинг мансабдор шахслари жавобгарлигини жиноий жавобгарликка тортиш, 2015 йилнинг 1 июлидан бошлаб микрофирмалар, кичик корхоналар ва фермер хўжаликлари фаолиятига оид барча текширувлар режали тартибда назорат органлари томонидан тўрт йилда бир мартадан, бошқа хўжалик субъектларида эса фақат Ўзбекистон Республикаси Назорат қилувчи органлар фаолиятини мувофиқлаштирувчи республика кенгаши қарорига асосан уч йилда бир мартадан кўп бўлмаган тартибда амалга оширилиши, шунингдек, молия-хўжалик фаолияти билан боғлиқ бўлмаган режали текширувлар ўтказиш муддати 10 календарь кундан ошмаслиги тўғрисида тушунчалар берилди.

Шу билан бир қаторда, 2015 йилнинг 1 июлидан бошлаб якка тартибдаги тадбиркорларга, фаолиятидан келиб чиққан ҳолда, ҳар бир ёлланган ишчи учун бюджетдан ташқари Пенсия жамғармасига энг кам ойлик иш ҳақининг 50 фоизи миқдорида суғурта бадали ва якка тартибдаги иш берувчи тадбиркор учун белгиланган солиқ ставкасининг 30 фоизи миқдорида солиқ тўлаш шарти билан бир нафардан уч нафаргача ишчини ёллаш ҳуқуқи берилди.

Таъкидланганидек, якка тартибдаги тадбиркорлар касб-ҳунар коллежи битирувчиларини ишга ёллаган ҳолатда коллежни битиргандан бошлаб ўн икки ой мобайнида ёлланма ишчилар учун белгиланган солиқдан озод этилади.

Шу билан бир қаторда, Фармонга асосан турли идоралар қошида фаолият юритаётган, алоҳида давлат хизматлари кўрсатаётган “бир дарча” хизматларининг ўрнига ҳокимликлар ҳузуридаги тадбиркорлик субъектларини рўйхатга олиш инспекциялари негизида “бир дарча” тамойили асосида тадбиркорлик субъектларига давлат хизматлари кўрсатиш Ягона марказларини ташкил этиш белгиланганлиги айтиб ўтилди.

Семинарга таклиф этилган иштирокчилар ҳам ўзларининг фикр ва мулоҳазаларини билдириб ўтдилар.