Янгиликлар
КАРАНТИНГА ОЛИНГАН ДАВРИМ ОЙЛИГИМГА ҚЎШИБ ҲИСОБЛАНМАДИ, БУ ТЎҒРИМИ?
Меҳнат кодексининг 285-моддасига асосан, вақтинча меҳнатга қобилиятсизлик нафақаси касал бўлинганда, меҳнатда майиб бўлган ёки бошқача тарзда шикастланганда, шу жумладан турмушда жароҳатланганда, оиланинг бетоб аъзосини парвариш қилганда, КАРАНТИН ЭЪЛОН ҚИЛИНГАНДА, санаторий-курортда даволанганда ва протез қилинганда тўланади.
“Давлат ижтимоий суғуртаси бўйича нафақалар тайинлаш ва тўлаш тартиби тўғрисида”ги низомнинг (рўйхат рақами 1136, 14.05.2002 й.) 17-бандига мувофиқ, агарда ходим карантин вақтида санитария-эпидемиология хизмати органлари томонидан атрофидаги шахслар орқали юқумли касалликка чалиниш хавфини олдини олиш мақсадида ишдан четлатилган бўлса нафақа берилади.
Юқоридагиларга асосан агар ходим расман санитария-эпидемиология хизмати органлари томонидан ишдан четлаштирилган ҳолда карантинга олинган бўлса, шу жумладан уй шароитидаги карантинда сақланган бўлса, унга бу давр учун вақтинча меҳнатга лаёқатсизлик нафақаси тўлаб берилади.
Бундай нафақа тўловларини олиш учун албатта, уйдаги карантинга олинган ходим томонидан тақдим этилган меҳнатга лаёқатсизлик варақаси асос бўлади.
Шунингдек, "Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида"ги 5969-сонли Президент фармонига асосан, коронавирус инфексияси билан зарарланиши ёки зарарланган деб гумон қилиниши муносабати билан карантинга жойлаштирилган ота-оналар (улар ўрнини босувчи шахслар, васийлар, ҳомийлар), шунингдек, уларнинг 14 ёшгача бўлган боласини парвариш қилаётган шахсларга ўртача ойлик иш ҳақининг 100 фоизи миқдорида вақтинча меҳнатга қобилиятсизлик нафақаси тўланади.
Эслатиб ўтамиз: Вазирлар Маҳкамасининг 254-сон қарор билан тасдиқланган “Коронавирус инфекциясини юқтирганликда гумон қилинган шахсларни уй шароитида карантинга жойлаштириш ва сақлаш вақтинчалик тартиби тўғрисида”ги низом 23-бандига асосан, уй шароитида карантинга олинган шахсларга меҳнатга лаёқатсизлик варақаси қонунчиликда белгиланган тартибда УЛАРНИНГ ЯШАШ ЖОЙИДАГИ ПОЛИКЛИНИКА ТОМОНИДАН берилади.