Янгиликлар
24
Vazirliklarning hududiy boʻlinmalari bitta binoga joylashtiriladi
Davlat boshqaruvi organlari va hokimliklar samaradorligini oshirish orqali aholi farovonligini taʼminlash va “mobil boshqaruv apparati”ni yaratish maqsadida 2022–2023-yillarga moʻljallangan Yangi Oʻzbekiston maʼmuriy islohotlari dasturini ishlab chiqish boʻyicha tashkiliy chora-tadbirlar toʻgʻrisidagi Prezident Farmoyishi qabul qilindi.
Farmoyishga koʻra, Yangi Oʻzbekiston maʼmuriy islohotlari dasturi loyihasiga takliflar ishlab chiqilishida quyidagilar ustuvor yoʻnalish hisoblanadi:
- davlat boshqaruvi organlarining maqomini belgilash;
- takrorlanuvchi vazifa va funksiyalarini qisqartirish;
- rahbar oʻrinbosarlarining yoʻnalishlar kesimidagi javobgarlik chegaralarini aniq belgilash;
- vazirlik va idoralar shtat birliklarini maqbullashtirish;
- boshqaruv jarayonini avtomatlashtirish, ish yurituvini toʻliq raqamlashtirish;
- “Ochiq idora” loyihasini amalga oshirish;
- davlat xizmatlarini toʻliq raqamlashtirish va fuqarolarning sansalorligiga barham berish;
- vazirlik va idoralarning ayrim funksiyalarini nodavlat sektoriga oʻtkazish;
- tegishli vazirlik va idoralarning hududiy boʻlinmalarini bitta maʼmuriy binoga joylashtirish orqali aholiga “Yagona darcha” tizimi asosida xizmat koʻrsatish;
- kadrlarni tanlov asosida va keng raqobat muhitida ishga qabul qilishni toʻliq joriy qilish;
- oʻz ustida ishlamaydigan va masʼuliyati boʻlmagan kadrlarga nisbatan “jamoaviy taʼsir”ni amalga oshirish;
- vazirlik va idoralarda yagona kadrlar reytingini yuritish;
- davlat xizmatchilari tomonidan olinadigan kafolatlangan bepul xizmatlar va vositalar paketini ishlab chiqish;
- tender va tanlovlarni ochiq va shaffof holda oʻtkazish tizimini takomillashtirish;
- xalq deputatlari Kengashlarining mahallalardagi mavjud muammolarni hal qilishdagi rolini oshirish;
- mahalliy vakillik organlarida doimiy asosda faoliyat yurituvchi deputatlar korpusini shakllantirish;
- hokimlar, ularning oʻrinbosarlari va maslahatchilarining vakolat chegarasini aniq belgilash.