Янгиликлар
Республика кўрик-танловининг якуний босқичи
Ушбу кўрик-танлов илғор иш тажрибасига эга бўлган маслаҳатчиларнинг тажрибаларини оммалаштиришда муҳим омил бўлиб хизмат қилмоқда. Бунинг натижаси ўлароқ, юртимизда ибратли, маърифатли оилалар сони йил сайин ортиб бормоқда.
Бу галги кўрик-танловнинг аввалгиларидан фарқи шундаки, жорий йилда Президентимиз Ислом Каримовнинг "Ўзбекистон Хотин-қизлар қўмитаси фаолиятини қўллаб-қувватлаш борасидаги қўшимча чора-тадбирлар тўғрисида"ги Фармони қабул қилинганига 10 йил тўлди.
Шу муносабат билан ҳар бир тумандан, шаҳардан бир нафардан 2004 йилдан буён самарали фаолият юритиб келаётган диний маърифат ва маънавий-ахлоқий тарбия масалалари бўйича маслаҳатчиси "Маҳалла" хайрия жамоат фонди республика бошқарувининг фахрий ёрлиқ ҳамда эсдалик совғалари билан тақдирланаяпти.
Фуқаролар йиғинларининг диний маърифат ва маънавий-ахлоқий тарбия масалалари бўйича маслаҳатчилари фаолиятида билим, тажриба ва маҳоратнинг уйғунлашуви натижасида маҳаллаларда ижтимоий-маънавий муҳит барқарорлиги таъминланиб, фуқароларнинг тиббий маданияти юксалмоқда, аҳолининг репродуктив саломатлиги мустаҳкамланиб, ёшларимизни миллий қадриятларга ҳурмат руҳида тарбиялашга эришилаяпти.
Фуқаролар йиғинларидаги жамоатчилик тузилмалари ҳамда диний маърифат ва маънавий-ахлоқий тарбия масалалари бўйича маслаҳатчилари фаолиятига оид тасдиқланган меъёрий ҳужжатларнинг амалиётга татбиқ этилиши маҳаллалар ишига кенг жамоатчиликни жалб этишга катта туртки бермоқда.
Бугун маслаҳатчи лавозимида етарлича ҳаёт тажрибасига эга бўлган, аҳоли, аввало ёшлар ўртасида соғлом турмуш тарзини қарор топтириш, миллий-диний анъаналар ҳамда урф-одатларни ривожлантириш масалаларида ижобий таъсир ўтказа оладиган жами 8545 нафар маслаҳатчи самарали фаолият кўрсатмоқда. Ўтган давр мобайнида ушбу тузилма вакиллари оилаларда маънавий муҳит барқарорлиги, миллатлараро дўстлик ва ҳамжиҳатликни мустаҳкамлаш, ёшларни ватанпарварлик, миллий анъана ва урф-одатларга садоқат руҳида тарбиялаш борасида кўплаб хайрли ишларни амалга оширди.
Маълумки, давлатимиз раҳбари Ислом Каримов Ўзбекистон Республикаси Конституцияси қабул қилинганининг 21 йиллигига бағишланган тантанали маросимдаги маърузасида соғлом бола тарбиясида маҳалла ва ижтимоий тузилмаларнинг тутган ўрни ҳамда таъсирини алоҳида эътироф этганди. Жумладан, маҳалла раислари, диний маърифат ва маънавий-ахлоқий тарбия масалалари бўйича маслаҳатчилар, маҳалла посбонларининг жамиятимиз ҳаётида тинчлик ва осойишталик, ўзаро ҳурмат ва ҳамжиҳатлик, ҳушёрлик ва огоҳлик муҳитини мустаҳкамлашдаги масъулияти янада ортиши зарурлигига ўз эътиборини қаратди. Айниқса, Юртбошимиз "Қиз болаларни тарбиялаш, уларнинг замонавий билим ва касб-ҳунарларни эгаллашига ёрдам бериш, эрта никоҳларнинг, оилавий низоларнинг олдини олиш, урф-одат ва маросимларни ихчам ва тартибли ўтказиш каби вазифаларни ҳал қилишда биз кўпни кўрган, тажрибали маҳалла фаолларига таянамиз", дея таъкидлагани тизим фаолларига билдирилган юксак ишонч ифодаси бўлди.
Кези келганда айтиш жоизки, маслаҳатчилар томонидан амалга оширилаётган кенг қамровли ишларни ўрганиш ва уларнинг илғор тажрибаларини оммалаштириш мақсадида Ўзбекистон "Маҳалла" хайрия жамоат фонди томонидан ҳамкор ташкилотлар билан биргаликда ҳар йили Фуқаролар йиғинларининг энг намунали диний маърифат ва маънавий-ахлоқий тарбия масалалари бўйича маслаҳатчиси кўрик-танлови ўтказиб келинмоқда.
Жорий йилнинг апрель ойида танловнинг туман, шаҳар босқичлари, май, июнь ойларида эса Қорақалпоғистон Республикаси, вилоятлар ва Тошкент шаҳар босқичлари ўтказилди.
Навоий шаҳридаги "Фарҳод" маданият саройида Қорақалпоғистон Республикаси, вилоятлар ва Тошкент шаҳридан биринчи ўринга сазовор бўлган 14 нафар маслаҳатчи иштирокида ўтказилган кўрик-танловнинг республика босқичи тантанали равишда очилди.
Танловнинг биринчи шартига кўра, диний маърифат ва маънавий-ахлоқий тарбия масалалари бўйича маслаҳатчиларнинг иш фаолияти бўйича ҳудудда амалга оширилаётган ишлари, эришилган ютуқлари, намунали иш тажрибаларига оид тақдимоти намойиш этилди. Тақдимотларда маслаҳатчиларнинг маҳаллаларда маънавий-маърифий ишларни ташкил этиш, оила турмуш муносабатларини мустаҳкамлаш, ёшларни, шу жумладан, қиз болаларнинг замонавий билим ва касб-ҳунарларни эгаллашига кўмаклашиш, аҳолининг ҳуқуқий маданияти ва саводхонлигини ошириш каби йўналишлар бўйича амалга оширилаётган чора-тадбирларга эътибор қаратилди.
Қизғин ўтган баҳсларда биринчи ўринга Бухоро вилояти, Қоракўл тумани, "Дўрмон" маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси Саломат Комилова, иккинчи ўринга Тошкент вилояти, Пискент тумани, Ойбек номидаги маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси Ҳуринисо Аҳмедова, учинчи ўринга Қашқадарё вилояти, Қарши тумани, "Ертепа" ҚФЙ вакили Латофат Чориева сазовор бўлди.
Танлов ва номинациялар бўйича ғолиблар Ўзбекистон "Маҳалла" хайрия жамоат фонди республика бошқарувининг диплом ва қимматбаҳо совғалари, Навоий вилоят ҳокимлигининг эсдалик совғалари билан тақдирланди.