Янгиликлар
Қулай ишбилармонлик муҳити
Муҳтарам Президентимиз раҳнамолигида юртимизда кичик бизнес ва хусусий тадбиркорликни ривожлантириш йўлида олиб борилаётган оқилона сиёсат, изчил ислоҳотлар — республикамизнинг юксак тараққиёти ва иқтисодиётининг жадал ўсишини таъминламоқда.
Бу борада мамлакатимизда қулай инвестиция иқлими ва ишбилармонлик муҳитини янада яхшилаш, иқтисодиётимизнинг таянчига айланган ушбу соҳани қўллаб-қувватлашга қаратилган қонун ҳужжатларининг қабул қилиниши муҳим аҳамият касб этаётир. Бу ҳақда гап кетганда сўнгги йилларда тадбиркорлик фаолиятига оид 20 дан ортиқ қонун, 40 га яқин Президент ва ҳукумат қарорлари, 100 дан ортиқ идоравий норматив-ҳуқуқий ҳужжат қабул қилинганини алоҳида таъкидлаш жоиз.
Ривожланган хорижий мамлакатлар тажрибасидан келиб чиқиб айтиш мумкинки, юртимизда кичик бизнес ва хусусий тадбиркорликни қўллаб-қувватлаш янги иш ўринлари яратиш ва аҳолининг ишончли даромад манбаи кафолати демакдир. Юқоридаги фикрлар яқинда вилоят ҳокимлиги ва телерадиокомпанияси ташаббуси билан "Ҳудудда ишбилармонлик муҳитини яхшилаш" мавзусида бўлиб ўтган очиқ телемулоқотда ҳам ўзининг яққол ифодасини топди.
Дарҳақиқат, ушбу очиқ телемулоқотда вилоят ҳокими Э. Турдимов тадбиркорлар олдида чиқиш қилиб, мамлакат иқтисодий ҳаётидаги вилоятимизнинг ўрни, ҳудудда бизнесни йўлга қўйиш учун барча шароитлар мавжудлиги, юксалиш жараёнларида кичик бизнес ва хусусий тадбиркорлик субъектларининг ҳиссаси, саноатни модернизациялаш, замонавий корхоналар барпо этиш, банк-кредит масаласи, оилавий тадбиркорликни ривожлантириш борасида олиб борилаётган ишлар, қўлга киритилаётган ютуқлар, шунингдек, тадбиркорлик фаолиятида юзага келаётган айрим муаммолар, сунъий ва бюрократик тўсиқлар ва уларни бартараф этиш омиллари хусусида ўз фикр-мулоҳазаларини билдирди.
Телемулоқот давомида тадбиркорлардан келиб тушган саволларга вилоят ҳокими ва тегишли ташкилотлар раҳбарлари томонидан батафсил жавоб ва зарурий тавсиялар берилди ҳамда мурожаатлар ижроси назоратга олинди.